hum ko ahde wafa nibhana hai

hum ko ahde wafa nibhana hai
zakham khana hai muskurana hai

ishq mehdood husn la-mehdood
hum ne hasti mita ke jana hai

zindgi jahan chehakti thi
ab wahan par yatimkhana hai

qatl kar ke bhi wo yeh kehte hain
qatl ka jashan bhi manana hai

koe daman bhi nam nahin dekha
kitna bedard ye zamana hai

kashtiyan apni phir jala dalo
behre zulmat gar mitana hai

hai akhwwat "jamil" ki fitrat
husn ikhlaq mein yaganah  hai


Jamil Jhansvi